Affichage des articles dont le libellé est dialecte bernois. Afficher tous les articles
Affichage des articles dont le libellé est dialecte bernois. Afficher tous les articles

07/08/2010

Dr Armin vo Thun

As Bueb isch dr Armin öppe die mitm Böötli d'Aare n'ab, vo Thun mängisch bis nach Bern. Irgendeinisch isch s ihm de im Bärner Oberland z'längwilig worde u er het sech drum entschide, nachemne Ustuschjahr i de USA z'St.Gaue Internationali Beziehige ga z'studiere. Obwou me dert ufd Frag nach emne Pack "Schnuderhudlä" höchschtens ä ratlose Blick kassiert, gfauts m Armin i sire Oschtschwizer Wauheimat usgezeichnet guet. Zum das usezfinde hets aber e länge Weg brucht. Nachemne Ustuschsemeschtr in Beirut u Praktika in Dubai u Riyadh umne witere Kurzstudium im Libanon füueut sech dr Armin in St.Gaue hüt umso wohler.
So wini dr Armin ischetzä, wird är während oder nach sim Jus & Oek-Master und emne Zuesatzlehrgang i Wirtschaftsjournalismus no dr eint oder angr Abstächr inä frömdi Kultur mache u so sini beidruckendi interkulturelli Kompetenz witer sterke. Bon voyage! (Foto © SJF)

31/07/2010

Dr Nadir

Dr Nadir chunt vo Bärn. Är het Gschicht u Soziologie ar Uni Bärn studiert u schafft itz sitteme Jahr a sim Dissertationsprojekt über di französisch-preussische Bezieige im 18. Jahrhundert. I sinere Arbeit heig är's sowou mit französische wie ou dütsche Quälle z'tüe. Di französische Quäue sige sprachlech aui sehr ähnlech, wärend di dütsche zum Teil ziemli grossi Ungerschide heige. Das chöng mer ou guet mit de hüttige Situation vergliiche, wo s'gsprochnige Französisch e viu höcheri Normativität heig aus z'Dütsche mit au sine verschidnige Dialäkte.

Was Sprache augemein aageit, sig er grundsätzlech am Wandu interessiert. Dä würd sech hüfig i Dialäkt schneuer manifeschtiere. Ebefaus interessant sy für ihn d'Zämehäng zwüsche Sprach u Politik. Usserdem heig är chürzlech agfange Italienische z'lehre. Das sig aube no praktisch bim Reise u Ferie mache. Di intaliänischi Gschicht interessiert ne aber ou. Genereu sige Passivkenntnis i europäische Sprache öppis wichtigs.

Ar Summerakademie heig är viu nöii Sache glehrt. Er sig ou uf de kultureu Wärt u d'Differänze zwüsche de Dialäkte sensibilisiert worde. So heig är ou di verschidnige Dialäkte vo de angere Teilnämer im Verlouf vor Wuche angersch afa wahrnäh.

29/07/2010

Karin - une archi appassionata Literaturwüsseschaftlerin zwüsche Bologna, Bärn et Paris

Voreme haube Jahr het d Karin ihre Muet zämegno und nach sächs Jahr Klavierspile afa Querflöte lehre, e Troum, wosi scho lang het gha. Aber nid nume im Bezug ufd Musig isch d Bärnere mit de läbhafte Ouge 'mehrsprachig'- si het grad zwo Landessprache zu ihrer Houptbeschäftigung gmacht: sit füüf Jahr studiert si französischi und italiänischi Literaturwüsseschaft ar Uni Bärn. Dür ihri Tante, wo im Burgund läbt, het si scho vo chlii uf en änge Bezug zum Französische gha. Gfeschiget het si ihrer Sprachkenntnis mit verschidnige Sprachufenthäut z Paris, z Perugia, z Floränz u z Bologna. Dadurch het si o e nöi Beziehig zur Schwiz becho: "I merke eifach immer widr, wie schön dasses isch hei z cho!" Aber gnue vo Sprache und em Reise het si wäg däm no lang nid. Wenn me se nach ihrne Zuekunftsplän fragt, steit 'e ganz exotischi u frömdi Sprach wie zum Bispiu z Mandarin lehre' zäme mit 'uf Kanada reise' a oberschter Steu.

Er Karin ihri grossi Lideschaft isch d Literatur usem nünzähte/zwänzigschte Jahrhundert. Bsungers d Outore Flaubert, Proust, Beaudelaire und Stendhal heisere aata. Aber wär itz dänkt, si verchrüüchi sech nume hinger Büecher, dä ligt fausch: Näb dr Uni trifft me se o hüüfig i experimentelle Theateruffüehrige, ir Opere oder ir Chliitheaterkunscht Bärn a, wosi mithiuft Literaturprojektli z organisiere. Sehr gärn betätiget si sech aber o körperlech u säglet übere Thunersee, spiut Tennis oder schiilet im Winter. Am Wuchenänd trifft si sech gärn mit Kollege u gniesst ds gmüetleche zäme Choche i voue Züg.

Ihri Nöigier fürd Spracheviufaut vor Schwiz het si ir Summerakademie vou chönne usläbe. Bsungers z er- und gläbte Spracherläbnis het se fasziniert, sigs bim Versuech morphologisch-syntaktischi Bsunderheite vom Vallader und Sursilvan usezschaffe oder bir stetige Suechi nach eme Versterchigspartiku fürs Bärndütsche, wo chönnt ad Steu vo 'mega', 'henne', 'hunne', 'wäuts' oder sogar 'huere' trätte. Ds Resultat? Es het archi gfägt :)